This is the testimony of Sis. Amelia Caraballe of Sampaloc, Manila local
Ako po ay lumaki sa isang pamilya na masasabing maka-Dios. Bata pa lamang ako ay kasa-kasama na ako sa gawain sa loob ng simbahan sa kinagisnang pananampalataya. Sa ganoong paraan ay unti-unting nabuo ang pag-ibig ko sa Dios.
Sa paglipas ng panahon ay nagkaroon ako ng pagnanasa na pumasok sa kumbento bilang madre subalit hindi ako pinayagan ng aking mga magulang. Maaari naman daw akong maglingkod kahit na hindi ako maging madre.
Bago ako makapagtapos ng highschool ay nagdasal ako na sa pagpasok ko sa kolehiyo ay makapaglingkod parin ako sa Dios. Ngunit sadyang malakas ang hatak ng sanglibutan nasubukan ko ding tumikim ng bisyo gaya ng alak.
Tunay na ang Dios ay mabuti sapagkat hindi Niya hinayaan na mapariwara ang buhay ko. Ipinasumpong ng Dios sa akin ang tunay na pananampalataya sa pamamagitan ng dati kong kamag-aral at kababayan na si Bro. Lhordy Prepuse na siyang nag-imbita sa akin sa pamamagitan ng facebook. Lagi siyang nagbibigay ng mga talata sa Bible at nagpapatotoo ng mga gawa ng Dios. Dahil sa katiyagaan ng kapatid ng Lhordy ay napagpasiyahan ko na dumalo at naisama ko din ang nag-iisa kong kapatid. Sa simula'y nanibago ako ngunit nang aking marinig ang Salita ng Dios ay napaiyak ako lalo na nang kami'y lumapit na upang tanggapin ni Cristo. Doon ko lang nalaman na may Dios pala na nag-aabot ng kaligtasan at nagpapatawad ng mga kasalanan.
Ang Dios ay kumilos na makapangyarihan at walang pagdadalawang isip na nagpabautismo kami. Naging masigasig ako sa paglilingkod lalo na sa pagdalo ng mga gawain gaya ng devotion. Kahit mag-isa lang akong nagbabyahe papunta sa lokal ng Manila ay dumadalo ako. Minsan ay kinakapos ako ng pamasahe at naglalakad na lang ako pauwi. Nagpapasalamat ako sa Dios dahil binigyan Niya ako ng pagkakataong paglingkuran Siya kahit sa mga ganong maliit na pagtitiis.
Taong 2012, dumating na ang pinakahihintay kong gawain sa Malagasang, Cavite ang Youth Camp, sapagkat yaon ang unang pagkakataon na nakadalo ako ng ganon. Bagamat isang taon at walong buwan pa lamang sa paglilingkod ay nahamon ako sa mga mensaheng aking napakinggan. Kaya ako ay tumugon sa hamon at panawagan ng Dios na ipagamit ang buhay sa paglilingkod. Ngayon sa biyaya ng Dios kinakasangkapan ako sa pangangaral ng Salita ng Dios at pag-aakay ng mga kaluluwa.
Ang mensahe ng salita ng Dios dala ng kaniyang tunay na sugo sa kawakasan ng huling araw ay buhay at makapangyarihang kumikilos sa puso ko upang magawa ang pinakamabuting paglilingkod.
Related Articles:
Buhay Para Kay Cristo
Nasumpungan ang Tamang Paglilingkod
Lubos na Pagtatalaga
